نقطة حبر نزلت غلط ....... على اخر الكلام
رسمت نقطة الحبر صورة غلط لعلامة استفهام
بصيت شوية وسرحت
ولقيتها فعلا مكتوبة
لعلامة مقلوبة
يادى العجب....؟
رفعت صوتى وصرخت
طب اية السبب....؟؟؟
قالو اصل الجواب مقلوب ... فسؤالك اتقلب
القط بقى فار وحمارك اتغلب
الجواب مقلوب؟؟؟؟؟
اة .. مقلوب الجواب
وخدها كدة بالخبرة
تقدر تقولى ياسيدى يعنى اية الدنيا اضيق من خرم الابرة؟؟؟
تموت عايش
وتعيش ميت وهى دية العبرة
قال اية.... العبرة بالنهاية
دى نهايتك هى اللى عبرة
بلااااااش دية
تسمع واحد بيقولك روحى فى مناخيرى؟؟؟
وهى الروح ياابنى بتسكن فى المناخير؟؟
ممكن!!!!!
اللى خلى خيرى
مادخل جوف عيالى
وسكن فى جيب الغير
والله الدنيا مقلوبة
شمالها يساوى يمين
تقدر تقولى اية الحكمة ان راسك فيها بدا العين الواحدة اتنين؟؟
اة طبعا... عشان اشوف بيهم
هاأأأأ ....حمار ياكبدى
والفهم عندك ضنين
العين الاولى تشوف بيها سنة
والتانية تبكى على اللى شافتة الاولى سنين
دى ودنك لو تسمع اية بيقول لسانك ماكان لسانك نطق الا جراح وانين
انسان نفسة يكون حمار ويعيش فى برطعة
وحمار نفسة يكون إنسان ويخلع البردعة
والله الحمار من حقة يكون انسان
اسألنى لية؟
ليـــــــــــــــــــــــــــــــــــــــة؟؟؟؟
هقولك لية
الحمار على الاقل عارف طريق دارة
اما الانسان غاية محط رجلة برة بيتة اتقل مقدارة
ياراجل!!!
ياراجل دة الحمار يقدر ياخد قرارة
ويفضح الانسان نفسة ويكتم سرة حمارة
وبعد دة كلة تقولى علامة الاستفهام مقلوبة ؟
دانت وظيفتك فى الحياة ارادة مسلوبة
تقدر تقولى اية الفرق بينك وبين الجزمة؟؟
ماااااااااافيش فرق زى مابلبسها بتلبسك
هى نفس الازمة
الفرق الوحيد هى ليها لزمة
هيييييييييية اقولك اية ولا اية
يقولك مصارين بطنك بتتعارك اية رأيك؟؟؟
تقدر تتدخل؟؟
تقدر تصلح بينهم او حتى برأيك تشارك؟؟
عشان تعرف اد اية انت ضعيف
قليل الحيلة... محكوم برغيف
يمكن تكون زلزلال هزتك
يدوب تهز عقلك والباقى من حياتك
وتدور وتلف وتقول....؟؟؟
ادونى حتة حياة فى طبق
هاعصر عليك لمونة وابلعها
يضحك عليك الزمن ويقولك....
ياابنى..
ياابنى الحياة محدش بيخدعها
هنروح بعيد لية بص كدة فى المرايا...
صورتك فيها معدولة
دة مش بعيد تبص فى المرايا تلاقى تلات اشخاص
واحد هو انت
والتانى يمكن تكون انت
والتالت مات خلاص
وبعد دة كلة تقولى علامة الاستفهام مقلوبة ؟؟
بقى انت مش مكسوف من نفسك؟
اية يعنى خرجت عن المألوف
يرحم ستى وستك لما قلبو الفنجان بعد العصارى
وبصوا لبعض وقالو...
اللى يعيش يـــــــــــاما يشوف
اللى يعيش يـــــــــــاما يشوف
اللى يعيش يـــــــــــاما يشوف
اللى يعيش يـــــــــــاما يشوف
هناك 7 تعليقات:
واللى يعيش ياما يشوف
السلام عليكم
كلماتك جميلة ومعبرة
وحاسس انها من قلبك اوى
واللى يعيش ياما يشوف
ربنا يكرمك helsing لكن هذه الكلمات ليست من تأليفي ولكنّها من أحد الكلمات التي حازت قمّة إعجابي فقررت نقلها لكي يقرأها الجميع
جزاك الله خيراً للمرور :)
ربنا يكرمك helsing لكن هذه الكلمات ليست من تأليفي ولكنّها من أحد الكلمات التي حازت قمّة إعجابي فقررت نقلها لكي يقرأها الجميع
جزاك الله خيراً للمرور :)
ده انت طلعتنا ولا حاجة
إختيار موفق
اولا المدونة جميلة ماشاء الله
ثانيا لاقيت المنتدى مش شغال قولت آجى أراقب هنا :d
في اي اعتراض
البوست ماشاء الله جميل
فعلا اللى يعيش ياما يشوف
لو كل واحد تأمل الحياة كده بجد هيلاقيها ماشية بالمشقلب
أكتر حاجة استغربت لها في الفترة الاخيرة دي
اختى بتشتغل في بنك جت بتقولى صدر قرار عندنا
منعوا لبس العبايات في الشغل:(
مرة يمنعوا النقاب ومرة يمنعوا العبايات عايزين الناس تلبس ايه مش عارفه والله حاجة تخنق
الدنيا ماشية بالمشقلب
معلش يا عمرو انا رغيت كتير بس الموضوع أثار حاجات كتير جوايا
منتظرة البوست الجاي بقى
ربنا يكرمك يا سمسمه وتشرفا بمرورك :)
هيه الدنيا فعلاً دي ماشيه بالمقروب بس مش معنى كده ان احنا نيأس ونقعد جنب الحيطه لأ طبعاً أنا ضد السلبيّة اللى كل الناس عايشه فيها دي
لازم كل واحد يفوق لنفسه وياخد ثقه زيادة ويقول للغلط لأ ، إنت غلط
وإلا كمان هتبقى ذنوب عليك
خليك إيجابي واعمل اللى عليك واوعاك تخاف وتقول أعيش مستور
وبعدين يا سمسمه إنتي إتعودتي تراقبي علينا في كل مكان ولا إيه .. ؟؟ :D
ياللا متعوده دايماااااااا :D
ربنا يكرمك
إرسال تعليق